《創教》

「爹娘，孩兒喜歡Mia教」將會是日後寫稿的主標題。「Mia教」，是名詞跟動詞，或是一組名詞？前者淺白正氣，以教學為本意；後者暗藏邪氣，似「收o靚」圖利。正邪本為兩道，但無論你點演繹，兩者於我目標一致：教好你個仔/女！

「Mia教」，教主是Mia Wong女士，芳齡不詳。其信徒年齡大部份介乎0-18歲，多聚集於班房，流連於公園及有玩具耍的地方。於2000年創教，起源於香港，近年延伸至中國大陸及澳洲，來年因互聯網的普及 + 我勤於寫作，將傳到世界各地。教旨：命運，因擁有知識而改變；你仲未變，因我地未相見。心存正念，無有恐怖；你驚我未驚，無須面青青，飲番杯椰青，學乖又練精。

當年大學畢業就開始創教，一教教到依家已18年。如果唔適合教，一早就應轉行，撐到今時今日，我相信係「萬物皆整定」。小女子就係生咗一副「教書相」。早年鐵版神數一批，「孔孟傳詩書，君當學堂走」。真係唔講你唔信，一講我就信，每日的工作，都離唔開教化。班房內教學生英文，公園裡教化小壞蛋，返到屋企教訓我愛人（打者愛也，愛者打多幾下嘛衰鬼）。

中學生同我講：「我就係鍾意聽你講書，搞笑得嚟又有深度。我亦喜歡你把聲，磁性得嚟又帶點感性。我更鍾意你為人，親切得嚟又唔作狀，老實得嚟又唔老土。」個學生like唔like我，我睇佢續唔續報下一期Regular Course已經知，實在呃我唔到。但班房以外的，又何解要死纏民女呢？真奇怪，每當有小朋友的地方，明明三唔識七，佢哋係要走埋嚟撩我玩。莫非我個樣生得滑稽？怪獸媽媽話：「可能你好笑容，又有耐性聽佢哋慢慢噏，講嘢又搞笑，又乜都識答，我個女話已經封咗你做偶像呀。」哦，原來佢地陰魂不散係有解嘅。咁你鍾意我，難道我要避麼？！況且我一見到小朋友，笑口就常開，興奮指數急升，遠勝當年取得初吻一刻。

經長年累月同年青人相處，我留意到出現了「你教不如Mia教」的現象。明明理論一樣，從爹娘口中講出，永遠當你發噏風，但講自Mia口，雞胡變天胡，麻雀變鳳凰。原理好簡單，你太了解你孩兒。佢的優點，你早已知曉，佢都懶得再重複表演過你睇。佢的缺點，你清清楚楚，佢當你已經接受咗，佢唔肯改你亦吹佢唔脹，鬼叫你係佢爹娘？唔通塞番佢入個肚度當無事發生過咩？但正所謂「人要面，橙要皮」，係我呢個陌生人面前，佢地唔敢輕舉妄動，唯有裝出一副乖樣以試探軍情。

你探我，我亦曉得探番你。有來有往，我請你食「旺旺」。你一係唔好出聲，你一同我講嘢，姐姐就知你喜歡玩乜嘢。姐姐呢隻老妖，最擅長摸小孩嘅心，自創「美亞小孩讀心術」，入咗我圈套，你咪打算著草。想變壞蛋？No way！！！想做不孝子？Go away！！！想英文好？Hip！Hip！Hurray！！！

唔寫咁長喇，無謂阻你吃飯。教主都好忙，忙住享受人生。唔好催我出稿，因寫作係講靈感。教化係我嗜好，不想為寫作設一個期限，因為我唔想當佢係一份工。強加壓力於嗜好，等於要限你在指定時間內排便一樣，傷身又傷心。各位善信，like者自like，唔like者自救（或自動消失吧）。打後教主將以課室內外的真人趣事與你分享「爹娘，孩兒喜歡Mia教」的奇怪現象。有緣再見！

＃我英文良好
＃但中文出左小小問題
＃已全力搶救中
＃有錯別字請指出及見諒
＃感謝各位百忙中收看
2018年6月13日